اااالليـــــاااااااااالي اااااالطويله(قصة حب الحزءالثالث)

الجزء الثالث:

البر

استيقظ فيصل فزعاً في الصباح الباكر على طرق جده لباب غرفته بعصاه, كانت الحجرة باردة والفراش دافياً يدعوه لعدم الرد.
فيصل:- شصاير
الجد:- انت للحين راقد!!!! يله اقعد .كم فات رقاد الضحى من غنايم.
فيصل:- ضحى !!!( نظر لساعته بصعوبه فأذا الساعه السادسه صباحاً) يبه الساعه توها ست.
الجد:- يعني الضحى. والا تبغي تقعد الظهر انت بعد!!
فيصل وهو يعرك عينيه :- يبه تبغي شي مني ؟
الجد:- قوم روح معاي البر بدل الرقاد.
فيصل:-يبه توني راقد عقب صلاة الفجر اليوم الخميس اجازه شيوديني البر من الفجر!
الجد:-اقولك الضحى تقول الفجر! انتو عيال هالايام ماتعرفون الاوقات عدل,لاتعاييني, بعدين انت ماتشبع رقاد كل يوم تصفٌر للقايله, يله خلصنا بتروح يعني بتروح وبنسوي غدانا هناك وبنوسع صدرنا وبنرجع قبل لايخلص النهار.
فيصل يعلم جيداً انه لامناص( ابحث في المعجم عن المعنى في حالة عدم معرفته) من الذهاب مع جده , هز رأسه موافقاً وهو يدمدم : نطبخ غدانا قال ...!!!!مادري كومار الي بيسويه.
الجد:- شعندك تتحندا؟
فيصل بكسل وهو يمشي للحمام :-ما شي خمس دقايق وانزل.
في الطريق كان الجد يغني بصوته الحاد باغنيه اغلب كلاماتها غير واضح ولكنها هوايته لذا اذا احس فيصل بأنه سينفجر سأله عن الماضي عن ايام عمل في شركة ارامكو السعودية فيتوقف عن الغناء ويبدأ في تذكر الماضي وتبدو على ملامحه لمسة حزن سرعان مايغلبها بالحديث عن الذكريات والتي تجعل فيصل يحس بضآلة مشكلته امامها .
الجد: شتبغي تعرف يابوك؟
فيصل:- أي شي.انتو شلون كنتوا تتعاملون مع الامريكان وانتوا ماتعرفون لغاهم؟
الجد:-تغربلنا يابوك معاهم ماشي جا بالسهل كانوا معازيبنا .امحق معازيب خذاهم الله, كان الفورمن علينا جون وكان يكرفنا في الشغل وكنا مانتهنى في عيشه ولا في رقاد غربله الله وين ماكان.
فيصل:-وش الله حادكم ليش ما ترجعون بلادكم؟
الجد:- وين نرجع تدري انا كنت الكداد على هلي كلهم حتى خواتي وعيالهم ,يابوك العيشه كانت صعبه واللي كان يشتغل في ارامكو كان عنده خير.تدري اني شريت سياره يوم كان الناس يمشون بالساعات على رجولهم عشان يقضون مشاوريهم؟.اسمع ياولدي, بقولك شي يمكن ماتصدقه تعرف انت وكيل سيارات المرسدس؟
فيصل:- ايه يبه يحطونه في الجرايد كل يوم.
الجد:- لا يابوك.انا اعاني الشيبه ابوه كنت اوصله من مكان لي مكان والله انه ساعات ماكان عنده اربع ناتيعطيني اياها, اجرتي يعني, والحين سبحان المعطي اللهم لاحسد تعطي الدنيا من تحب ومن لاتحب وتعطي الدين من تحب.اللهم اجعلنا ممن تحبهم.
فيصل يستمع وهوغير مصدق فلم يقاطع جده.

الجد: فصول قول آمين ياسود الوجه.
فيصل: آمين يبه امين. والله مب قصدي كنت افكر في كلامك.
الجد: شفيك؟ قليل اللي كان عنده خمسطعشر الف تسمعني خمسطعشر الف من خمسين سنه احسبها عاد انت.
اخذ فيصل يفكر بجده لقد عمل بجد منذ طفولته ليحقق النجاح لنفسه ولعائلته.
الجد:- الحلال ياولدي الحلال طعمه حلو احلى من العسل,لكن انك تتحرى الحلال في كل شي ترى مهب سهله السالفه مثل ماتجمع النحله الرحيق وتكون العسل .

فيصل: ذكرتني يبه بالشاعر اللي يقول:

يامدور الهين ترى الكايد أحلى أسأل مغني كايدات الطروقِ
الزين غالي لكن الازين اغلى ولكل شراي بضاعه وسوقِِ

الجد:- صح لسانك يولدي, منهو ذا الشاعر ماصدقه.
فيصل:-ومن قال ,هذا يبه الامير خالد الفيصل.
الجد :- قصِيِِِده حلو ( المعنى هو ان شعره حلو وليس القصيده فقط) عندك غيره؟
فيصل:- بووووووه. تراك وصلت انا احفظ اغلب قصايده .حفظتها يوم كنت في امريكا لولاه كان طفرت كان شعره معاي في كل لحظه.
الجد:- ياسود الوجه. وتتفاخر. بدل ماتقول كتاب الله كان معاي وهو اللي حفظته.قاص علينا طول هالمده واحنا نحسبك ديَن تراك طايح في الشعر وبس وناسي دينك .معليه معليه (واستمر الجد يهمهم ويتوعد وفيصل يحدث نفسه:انا شللي طيحني بهالورطه معاه صدقت انه ربشه الحين شللي بيفكني من لسانه).
بعد دقائق صمت عاد الجد للغناء وفكر فيصل ان صوته الكرواني( بالعكس) افضل من صراخه وغضبه.

في بيت ابو احمد.

تمسك مناير بالهاتف وتتصل في بيت عمتها لولوه
يرن الهاتف طويلاً قبل ان يجيب عبدالله حاملاً في يده كوب الشاي :الو
مناير: عبيد, اهلين.
عبدالله: الناس يقولون السلام عليكم وبعدين انا عمج الشيخ عبدالله.
مناير: عمت عين العدو. السلام.المهم شلخبار؟
عبدالله:- اعنبوج انتي ماكنتي في بيتنا البارحه لين نص الليل شخباره بعد؟
مناير:- so؟ انت تنيذلت وطلعت ومادري شسويت مع ربعك يوم طلعت.
عبدالله:- وانتي تظنين اني بقولج وين رحت ووين جيت, ليكون مرتي وانا مادري!
مناير:- تخسي انت ..مابقى الاانت بس.. تحلم.
عبدالله:- شوفي عاد لو قلت ابغي أخذج غصب عنج بتزوجيني بس احمدي ربج اني عادج مثل عنود وجوجو.
مناير: اوهووووو خلصت الفلم البدوي,عطني جوجو بسرعه.
عبدالله يصرخ منادياً اخته: جوووووووووووووووووووجوووووووووووووووووو,تيلفون.
بعد دقائق تصل وتمسك السماعه: الو.
مناير:- هذيه عبود يرفع الضغط انتو شلون مستحملينه كان خاطري ادخل يدي في السماعه واكفخه.
الجوهره:- شفيج منور؟يالله صبح خير .
مناير:- دايماَ يحرني يتعمد في كل مره يذكرني اني مجرد بنت ومالي اني افكر بشي غير البيت والمدرسه.
الجوهره:- فديته, والله انه يضحك معاج لو تشوفينه لين يكلمج شلون ابتسامته تشق الحلج,يحب ينقشرج وانتي بعد ماتوصين.
مناير:- خلينا منه الحين اي لون بتلبسون اليوم حق بيت جدي؟
الجوهره:-مادري يمكن التنوره الجينز والقميص البيج
مناير:- لا البسوا الوردي احسن يفتحنا
الجوهره :- اوكي.
اخذتا تتحدثان حتى طلبت عمتها لولوه الهاتف فأتفقوا على تكملة الحديث في المساء.

المغرب نفس اليوم في منزل الجد ابو محمد

ام محمد مصره على ان تشاهد قناة ابوظبي ( قناة بلادها ) ومناير تطالب بمشاهدة المسلسل.
الجدة:- ماجنج سندرتينا , خلينا اشوف زايد رايح يشوف النخل وياكل رطب ياحيه.
مناير: يدوه , انتي كل يوم تشوفينه خليني اشوف المسلسل الحلقة اليوم حلوه.
الجدة: انتي جايه عندي تشوفين التلفزيون روحي حق البنات .
مناير:- يمه ماجاوا للحين.وانا متملله.
الجده تشاهد زايد وهو يطوف بالنخل ثم يجلس ويضعون امامه صحون الرطب بأنواعه يسيل لها اللعاب وهم فخروين بأنتاجهم لهذه السنه ويتذوق زايد منه ثم يعتدل ويحدثهم والجده تنصت بأندماج شديد وترد عليه كأنه يحدثها حتى وهو ينهي حديثه بالنصائح المهمه والتي تعتبر خطه يطبقها المسئولين واثبتت نجاحها دائماً, كان الذي يميزه ان حديثه منطقي بغض النظر عن طريقة كلامه البسيطه السلسه والتي يفهمها جميع الخليجيون وليس الاماراتيون فقط بالاضافة الى بعد نظره وحكمته في المسائل السياسيه العالمية التي تثير التعجب.

تنادي الجده مناير : مناير, اندوج خلص زايد خذي الجهاز.
مناير:- اوه اوه قلب اللسان يوم شفتي زايد!!
الجده :- شفيني؟ هذي رمستي اذا ماتعجبج اختاري واحد من هالجدران.
مناير وهي تضحك:- لا يمه فديتج اضحك معاج ( تضم جدتها لها وهي تفكر انها بمجرد تواجد جميع افراد العائلة ستعود اللهجة القطريه مرة اخرى كالعاده).

يصل فيصل مع جده وماأن يدخل حتى يمسك الهاتف ويجري مكالمه ويستعد للخروج.
مناير تناديه:- فيصل, وين رايح؟
فيصل:- شتبين؟ اليوم خميس وعندج جمعة يعني وجودي مش مهم.
مناير: عاااااد.وش أخر مغامرات جدك؟
تذكر فيصل الموقف الاخير له: اسكتي بغينا نولي تحمديلنا بالسلامه.
مناير :- الحمد الله على السلامة. شصار؟

فيصل:- تصدقين غافلني وقال حق الهندي يحط الدوه بالجمر اللي فيها في تندة العراوي جان تشتعل من الهوا القوي واحنا فالطريق لومالمحتها جان بقت السيارة وجان تفقدين الجد والحبيب في نفس الوقت.
مناير: سمله عليكم ان شاالله عدوينكم. والله ان الله حفظكم .بعدين لاتقعد تقول حبيبج أخاف بعدين تصدق ولين تزوجت غيرك تنقهر وتستخف.
فيصل:- خفاف يصيد فلانه مادري من انتي وحده من معجبات وااااااااااايد,بس قلبي مب اي وحده تاخذه. (ينصرف بسرعه قبل ان ترد وهو مستعجل)

يركب سيارة صديقه يوسف وهو يعلم انه تأخر عليه كثيراً.
فيصل:- السلام عليكم ورحمة الله وبركاته.
يوسف:- وعليكم السلام, جان ماجيت... خست وانا انطر كلهم هناك الا احنا.
فيصل:- عاد تدري الشياب وتصانيفهم ,عزم ياخذني معاه ,يأخي حاسدينا على هالكم يوم اجازه اللي عندي طول عمري وأنا اكرف وتوني مخلص الجامعه ماصار لي شهر ويحنون يبغوني اشتغل.
يوسف:- عسى , انت ماعندك سالفه وظيفتك وتنطرك في المؤسسه ليش ماتداوم وتفكنا.
فيصل:- يبغون اوراق زياده للحين ماخلصتها, يمكن على الشهر الجاي.يكفي اني اروح الشركه كل يوم العصر واساعد ابوي في تجديد سيستم الشركه .
يوسف:- احمد ربك انت بس انا مول ماعطوني اجازه وخلوني اداوم على طول صج غثا.

يوسف صديق فيصل منذ الطفولة(لن أذكر العمر فهو في نفس عمر فيصل للتذكر الرجاء العوده لأول القصه ) درس في الدوحه وتوظف كنائب لمدير شركة المقاولات الخاصة بابيه هوعصبي وعنيد ولكنه رجل بكل معنى الكلمه لديه القدرة على العمل تحت الضغط الشديد لايحب ان يدخل نفسه في متاهات اذا اردت منه شي يجب ان تقول خلاصة الموضوع, الدنيا لديه هي 1+1= 2 وسيم للغايه لكنه نحيف يعيش على الاغذيه الخفيفه وأحيانا ينسى ان يأكل ولوكان جسمه رياضياً لأصبح شيً آخر انه يتيم ولديه اخت واحده هي توأمه امنه وسأتي على ذكرها قريباً.

في صباح اليوم التالي اراد ابو محمد أن يذهب للسوق لشراء جزئيه صغيره في الصنبور لاستبدالها بدل التي يظن انها السبب في التسرب ,انها حجته للخروج من المنزل هذا الصباح ( هو دائماً يعتمد على نفسه في أغلب الحالات وأن كان لايتقنها 100% والسائق الذي يعمل لديه يدربه ليصبح نجاراً وسباكاً وبناءَ وصباغاً وكهربائي) المهم ركب مع سائق ابنه سعود (رجب المصري) واركب سائقه الجديد في الخلف وما ان وصل للسوق حتى انزل السائق الاسيوي (كعادته معهم في بداية عملهم معه) وتركه في الشارع وامره أن يدبر نفسه ويعود لوحده للمنزل. وقف الرجل مشدوه تحت الشمس الحاره حتى أنه لم يتحرك للظل,أخذ ينظر للسياره بغباء حتى ابتعدت عن ناظريه ضمن عشرات المركبات.انتهز السائق المصري مجادلة ابومحمد لبائع الادوات الصحيه واتصل في سعود وبصوت منخفض كلمه وهو يسترق النظرات لأبومحمد: ايوه يابوأحمد, الحاج نزل الهندي الجديد في وسط السوء وقالوه اتصرف,أعمل ايه انا دلوئتي؟
ابوأحمد:- وين نزلتوه يعني؟ ومتى؟
وصف السائق لأبو أحمد الموقع بالضبط, وحاول أن يترك مابيده بالبنك وخرج وسط الزحام وهو يضحك محاولاً انقاذ مايمكن انقاذه وما ان وصل حتى وجد الاسيوي واقف في نفس المكان بالضبط , اشترى له قنينة ماء واستدار عائداً للمنزل وهو يفكر بأن هذا السائق لن يعمر طويلاً مع ابيه. تذكر سائقه المصري رجب عندما صحب اباه لأول مره وعاد اخر النهار فسأله عن أخباره فأجاب: اسكت يابو احمد, مش أنا كنت طول اليوم بأكل خ.....
ابو أحمد: شهالكلام؟
رجب:- والله, دا ابوك يافندم كل ماؤله مش كده ياحج يئولي كل خ.....
عندها ضحك ابو أحمد لأنه يعلم جيداً أن اباه لايحب أن يجادله أحد, عاد ورواها لأمه التي ضحكت والتي بدورها روتها لبناتها كطرفه جديده لأبيهم.

في المساء في المجلس الخارجي جلس ابوأحمد بجانب اباه وتحدث معه بصوتٍ منخفض :
:-يبه شخبارك مع دريولك اليوم؟
الجد:- خله يولي .ثور هذا مامنه فايده وماظني يصير رجال.
ابوأحمد:- يبه انت كل دريول تقول عنه هالكلام.تذكر سوني؟ سويت فيه نفس الشي.
الجد :- ذاك غير, كان يعد نفسه المعزب وانا الدريول,عيل ذاك اليوم نزلت البلديه اقوله انطرني ماني متأخر اطلع مالقاه!! زين ان مفاتيح السياره عندي رجعت البيت عنه.
ابو احمد ضاحكاً: يبه سوني نطرك لين مانظى من الشمس ويوم رجع انصدم يوم لقاك في البيت قاعد تتغدا.
الجد:- انا الي اشتغل عنده والا هو اللي يشتغل عندي!! انا مانطره هو ينطرني.(قالها بكبرياء)